Mwanzo
Kuhusu
Huduma
Viunganishi
JAMHURI YA MUUNGANO WA TANZANIA

MAMLAKA YA MAWASILIANO TANZANIA

TAASISI YENYE VIWANGO VYA ISO 9001: 2015

Habari

TCRA: Jamii Ishiriki Kuwalinda Watoto dhidi ya Ukatili Mtandaoni


TCRA: Jamii Ishiriki Kuwalinda Watoto dhidi ya Ukatili Mtand...

 

Ili kuwalinda Watoto dhidi ya ukatili mtandaoni jamii nzima inapaswa kuhusika wakiwemo Watunga Sera, Asasi za Kiraia, Viongozi wa Dini, Mamlaka za Usimamizi wa Sheria na jamii yote. Aidha imebainishwa kuwa ukatili wa Watoto mtandaoni unaweza kukoma ikiwa jamii yote itashirikiana kutokomeza matukio ya ukatili.

Akizungumza katika kipindi cha Kumepambazuka kinachorushwa na kituo cha redio One jijini Dar es salaam Afisa Mawasiliano Mwandamizi Mkuu wa Mamlaka ya Mawasiliano Tanzania (TCRA) Bw. Semu Mwakyanjala alibainisha kuwa pamoja na Sheria zinazowalinda Watoto dhidi ya unyanyasaji na udhalilishaji kuwepo ikiwemo sheria ya makosa mtandaoni ya 2015, bado jamii inapaswa kushiriki kikamilifu kuwalinda Watoto dhidi ya ukatili kwenye mtandao.

“Mambo ya kihalisia katika ulimwengu wetu hayapo tofauti na yale yanayotendeka kwenye mifumo ya mtandao, hivyo ikiwa tunawalinda Watoto dhidi ya ukatili kwenye ulimwengu wa kawaida, vivyohivyo tuwajibike kuwalinda katika mazingira ya kimtandao na kwenye mifumo yote ya mawasiliano,” alisisitiza Mwakyanjala.

Afisa huyo aidha, alisisitiza umuhimu wa waandaaji wa maudhui mtandaoni pamoja na waundaji wa mifumo ya Mawasiliano inayobeba maudhui kuhakikisha wanaweka miundombinu inayowalinda Watoto wakati wanapolazimika kuingia kwenye mitandao kwa shabaha ya kujifunza na kupata elimu.

“Waandaaji maudhui wanatakiwa wahakikishe maudhui wanayotengeneza yanakuwa yenye staha, yasiwe yenye kuhamasisha ukatili dhidi ya watoto,” alisisitiza. Shirika la Umoja wa Mataifa la Watoto (UNICEF) linabainisha kuwa ukatili dhidi ya Watoto umekuwa ukiongezeka hasa miongoni mwa Watoto wa kike ambapo Sheria ya Makosa ya Mtandao ya 2015 kifungu cha 13 inatoa katazo la kuchapisha ponografia za Watoto kwenye mifumo ya kompyuta, aina ya ukatili ambapo UNICEF inaeleza umekuwa ukiongezeka kwa kasi kwenye mazingira ya mtandao. 

© 2022 TCRA, Haki zote zimehifadhiwa.